იუსტიციის მინისტრის ინიციატივით,უფასო პირადობის მოწმობების გაცემა ომისა და სამხედრო ძალების ვეტერანებისთვის მიმდინარეობს. აქცია 15 თებერვალს დაიწყო და 15 მარტის ჩათვლით გაგრძელდება. ამ დროისთვის აქციით 1056–მა ვეტერანმა ისარგებლა.

ყველა ვეტერანს, გარდაცვლილი ვეტერანების  მეუღლეებსა და შრომისუუნარო, ოჯახის სრულწლოვან წევრებს, რომლებსაც პირადობის ახალი მოწმობა  ჯერ არ აუღიათ, აქცია საშუალებას აძლევს, დოკუმენტი  სრულიად უფასოდ მიიღონ. აქციის ფარგლებში ყველა მათგანი თავისუფლდება როგორც დოკუმენტის, ისე ფოტოსურათის გადაღების ღირებულებისგან.

დღეისათვის საქართველოში ომისა და სამხედრო ძალების 72 000-მდე ვეტერანია რეგისტრირებული.

აქციაში მონაწილეობის მსურველებმა თბილისში შემდეგ დროებით სერვის-ცენტრებს უნდა მიმართონ:

• დავით აღმაშენებლის ხეივანი მე-10 კილომეტრი, (აღსრულების ეროვნული ბიურო)

• ვაჟა-ფშველას №1, (ეროვნული არქივი)

• აღმაშენებლის გამზირი 89/24 საჯარო რეესტრის თბილისის სარეგისტრაციო სამსახური (მარჯანიშვილის მეტროსთან)

მზა დოკუმენტების მიღება შესაძლებელია იუსტიციის სახლის შენობის მარცხენა მხარეს. დროებითი ფილიალები მომხმარებლებს 09:00 საათიდან 19:00 საათამდე მოემსახურებიან.

შეგახსენებთ, მიმდინარე წლის განმავლობაში, იუსტიციის მინისტრის ინიციატივით, უფასო პირადობის მოწმობები უკვე გადაეცათ სრულწლოვან დევნილებს, რეგისტრაციიდან მოხსნილ პირებსა და პედაგოგებს.

ეკა მამალაძე

მარკეტინგული კომუნიკაციისა და საზოგადოებასთან ურთიერთობის

სამსახურის უფროსის მოვალეობის შემსრულებელი

სახელმწიფო სერვისების განვითარების სააგენტო