ამა წლის 26 ოქტომბერს, დღის 12 საათზე გრიგოლ აბაშიძის ქ. № 4-ში (პატარა სამების ეკლესიასთან) საქართველოს ძალოვან ვეტერანთა და პატრიოტთა პოლიტიკური მოძრაობის ოფისში შედგება შეხვედრა უკრაინის ძალოვან ვეტერანთა დელეგაციასთან, რომელსაც ხელმძღვანელობს უკრაინის ყოფილი უშიშროების საბჭოს პასუხისმგებელი მუშაკი, იურიდიულ მეცნიერებათა დოქტორი, პროფესორი, გენერალ-მაიორი ალექსანდრე იარმაში. დელეგაციის შემადგენლობაში შედიან უკრაინის შსს პროფკავშირების თავმჯდომარე პოლკოვნიკი ანატოლი ონიშენკო, ასევე საერთაშორისო პოლიციელთა ცენტრის დირექტორის მოადგილე, რუსეთის ფედერაციული რესპუბლიკის ძალოვან ვეტერანთა ასოციაციისა და პროფკავშირების თავმჯდომარე, პოლკოვნიკი ალექსანდრე ლობარევი.
მათი ჩამოსვლის მიზანია საქართველოში თადარიგის ვეტერანთა სოციალური მდგომარეობის შესწავლა, შინაგან საქმეთა სამინისტროში მიმდინარე რეფორმების შედეგების გაცნობა და მხარდაჭერა, ასევე დადებითი გამოცდილების გაზიარება, მასმედიის მეშვეობით მისი პოპულარიზაცია და საკუთარი ქვეყნების შესაბამის უწყებებში დანერგვა.
საერთაშორისო პოლიციის ასოციაციის უკრაინის სექცია აპირებს თანხმობის შემთხვევაში რეკომენდაცია მისცეს საქართველოს პოლიციელების გაერთიანებას პოლიციის საერთაშორისო ასოციაციაში.