03.052011 საქართველოს ომის
ვეტერანთა ფედერაცია (ომის ვეტერანთა ორგანიზაციების
გაერთიანებული საბჭო) განცხადებას ავრცელებს, რომლითაც
სრულად ემიჯნება პოლიტიკას და კიდევ ერთხელ აფიქსირებს
ვეტერანთა ფედერაციაში შემავალი არასამთავრობო
ორგანიზაციების პოზიციას.
საქართველოს ომის ვეტერანთა ფედერაცია (ომის ვეტერანთა
ორგანიზაციების გაერთიანებული საბჭო) განცხადებას
ავრცელებს, რომლითაც სრულად ემიჯნება პოლიტიკას და კიდევ
ერთხელ აფიქსირებს ვეტერანთა ფედერაციაში შემავალი
არასამთავრობო ორგანიზაციების პოზიციას.
საქართველოს ომის ვეტერანთა ფედერაციის თავმჯდომარე
ალექსი ნაკანი ”24 საათთან" საუბარში აცხადებს, რომ წესდების
თანახმად, ვეტერანთა ფედერაცია აპოლიტიკური ორგანიზაციაა
და მათ მიმართვაში სწორედ ესაა ხაზგასმული.
”უბრალოდ, ჩვენ არ გვინდა, რომ ვეტერანები კიდევ ერთხელ
ჩაითრიონ ბინძურ პოლიტიკურ თამაშებში. ვეტერანები ბევრჯერ
გამოიყენეს მუშტად და შემდეგ მთელი პასუხისმგებლობა
მომხდარზე დააკისრეს მათ.
ჩვენ ცალსახად ვაცხადებთ, რომ ეს აღარ უნდა განმეორდეს! იმიტომ,
რომ გავიზარდეთ და გაგვაჩნია საკმაო გონებრივი პოტენციალი და
ცხოვრებისეული გამოცდილება, რომელიც უნდა გამოვიყენოთ
ვეტერანებისა და ომში დაღუპული თანამებრძოლების ოჯახის
წევრთა საკეთილდღეოდ და არა რომელიმე კონკრეტული პარტიის
პოლიტიკური ამბიციების დასაკმაყოფილებლად. ჩვენ კვლავაც
სამშობლოს ჯარისკაცებად ვრჩებით და პოლიტიკური
თამაშებისთვის არ გვცალია. გვაქვს ბევრი პრობლემა
მოსაგვარებელი და თუ მათ თავად არ მივხედეთ, სხვა არავინ
მიხედავს," - განუცხადა ალექსი ნაკანმა ”24 საათს".
საქართველოს ომის ვეტერანთა ფედერაცია მიიჩნევს, რომ
გარკვეული პოლიტიკური ძალები ვეტერანთა მძიმე სოციალური
მდგომარეობით მანიპულირებენ და მათ სამოქალაქო
დაპირისპირებისკენ უბიძგებენ.
”სამწუხაროდ, ეს პოლიტიკოსები ამკვიდრებენ
საზოგადოებაში აზრს, რომ კრემლი ჩვენი მტერი არ არის. ჩვენი
ხედვით, ეს ადამიანები ხელს უწყობენ ქვეყნის დანაწევრებას და
საბოლოო ანექსიას. მათ გვერდით დგომა იმათგან, ვინც სიცოცხლე არ
დაიშურა სამშობლოს თავისუფლებისა და მთლიანობისათვის,
უბრალოდ, აბსურდია, - აცხადებს ”აფხაზეთის მეომართა კავშირის"
თავმჯდომარე და საქართველოს ომის ვეტერანთა ფედერაციის
თავმჯდომარის მოადგილე თენგიზ ლომია, - ვეტერანები არ უნდა
იქნენ გამოყენებული პოლიტიკურ ბატალიებში. ყოვლად
მიუღებელია მოწოდება სამოქალაქო დაპირისპირებისკენ და
ძალადობით ხელისუფლების შეცვლისკენ. ჩვენ ყოველივე ამას
ვემიჯნებით. ვეტერანებმა სამშობლოს უკვე მივეცით ფიცი და
ნებისმიერი ახალი ფიცი, რომელიმე პოლიტიკური ძალისთვის
მიცემული, ჩვენთვის მიუღებელია. თან, მინდა ისიც აღვნიშნო,
რომ არც ერთ იმ პოლიტიკოსს, რომელიც ახლა რადიკალურ ოპოზიციას
წარმოადგენს, არც კი უცდია ვეტერანთა მდგომარეობის
გაუმჯობესება ხელისუფლებაში ყოფნის დროს. პირიქით, სწორედ
ისინი გვეძახდნენ მოღალატეებს და გვათავისუფლებდნენ
სამსახურებიდან."
ვეტერანთა ორგანიზაციების გაერთიანებულ საბჭოს არ სურს,
რომ ქვეყანა ხელახლა აღმოჩნდეს სიტუაციაში, როდესაც
”რუსული მხარის ჩარევით მოხდა ჯერ სამოქალაქო
დაპირისპირება, შემდეგ კი - ეთნოკონფლიქტებად წოდებული
რუსულ-ქართულ ომი".
საბჭოს საერთო პოზიციას უერთდება ადამიანის უფლებების
დაცვისა და პატიმართა სოციალური უზრუნველყოფის
საერთაშორისო ორგანიზაციის თავმჯდომარე, ვეტერანთა
ფედერაციის თავმჯდომარის მოადგილე იურიდიულ საკითხებში და
ვეტერანთა ომბუდსმენი გიორგი თევზაძე, რომლის განცხადებით,
გარკვეული პოლიტიკური ძალები მანიპულირებენ და თავს
ახვევენ თავიანთ პოზიციას ვეტერანებს, ამით კი, ქვეყანა
ზარალდება.
”უნდა ვიმუშაოთ იმაზე, თუ როგორ გაუმჯობესდეს ვეტერანთა
სოციალური მდგომარეობა და დაცული იყოს მათი უფლებები, და -
არა იმაზე, თუ როგორ დაესხას ვიღაცის წისქვილზე წყალი. ეს არც
ვეტერანისთვის არის კარგი, არც მოქალაქისთვის და, მითუმეტეს,
არც ქვეყნისთვის. ზოგიერთი პოლიტიკოსი არ უკვირდება, რომ
ამან უარყოფითი შედეგი შეიძლება მოუტანოს სახელმწიფოს.
ფედერაციაში გაერთიანებული ორგანიზაციების
უმრავლესობის საერთო სურვილია, ერთობლივად იმუშაონ
დასახული პრობლემების გადაჭრაზე, რომელიც შეეხება
ვეტერანთა სოციალური და სამართლებლივ უფლებების დაცვას.
ამასთან დაკავშირებით ვგეგმავთ სახალხო დამცველთან და
საკანონდებლო ხელისულების შტოსთან კონსულტაციებს;
დაგეგმილი გვაქვს საერთაშორისო ორგანიზაციებთან მჭიდრო
თანამშრომლობა," - განაცხადა დმცველმა ვეტერანთა
ომბუდსმენმა გიორგი თევზაძემ.
"ვეტერანები განეკუთნებიან იმ სოციალურ ჯგუფს, რომელსაც
სახელმწიფოსაგან მეტი ყურადღება ესაჭიროება. ძალზე
მნიშვნელოვანია ვეტერანების ფსიქოლოგიური რეაბილიტაცია,
რათა მოხდეს საზოგადოებაში მათი სრულყოფილი ინტეგრაცია და
ისინი გახდნენ სამოქალაქო საზოგადოების სრულფასოვანი
წევრები," - ამბობს ვეტერანთა კავშირის ”ვეტერანები
მშვიდობისათვის" თავმჯდომარის მოადგილე და ვეტერანთა
ფედერაციის დამფუძებელი მიხეილ წიქარიძე.
როგორც ვეტერანთა კავშირის ”ვეტერანები მშვიდობისათვის"
თავმჯდომარე დავით სიჭინავა აცხადებს, ორგანიზაცია მხარს
უჭერს საქართველოს ნატო-სკენ სწრაფვას და არა ქვეყნის
დეგრადაციას, როგორც ეს რადიკალურად განწყობილ პოლიტიკურ
ძალებს სურთ.
”გვინდა, რომ სრულფასოვანი მონაწილეობა მივიღოთ
საქართველოში ევროპული დემოკრატიული ღირებულების და
ფასეულობების დამკვიდრებაში, ამასთანავე აქტიურად
ჩავერთოთ ეკონომიკურად განვითარებული და სამართლიანი
ქვეყნის აღმშენებლობის პროცესებში," - ასეთია ფედერაციის
წევრთა საერთო აზრი.
საუბარს ფედერაციის თავმჯდომარე ალექსი ნაკანი
ასრულებს: ”ჩვენ კარგად გვესმის ჩვენი წვლილის მნიშვნელობა
ქვეყნის დამოუკიდებლობის საქმეში და გვინდა, რომ ეს
საზოგადოებამაც სრულად გააცნობიეროს. ბევრს არ ვითხოვთ, აი,
მაგალითად, 28 აპრილს წერილი გავუგზავნეთ საქართველოს
პრეზიდენტს, საქართველოს დამოუკიდებლობის დღესთან
დაკავშირებულ სამხედრო აღლუმში ვეტერანების მონაწილეობის
თხოვნით. ეს ჩვეულებრივი პრაქტიკაა განვითარებულ ქვეყნებში და
ვფიქრობ, ქართველმა ვეტერანებმაც სრულად დაიმსახურეს
ამგვარი პატივი.”
საქართველოს ომის ვეტერანთა ფედერაციის
(ვეტერანთა ორგანიზაციების გაერთიანებული საბჭოს)
განცხადება
საქართველოში ამ ბოლო პერიოდში განვითარებულმა
მოვლენებმა წარმოაჩინა გარკვეული პოლიტიკური წრეების
აქტიურობა და ფსევდოპოლიტიკური ამბიცია, რასაც ჭეშმარიტ
პოლიტიკასთან და ქართული საქმის კეთებასთან საერთო არაფერი
აქვს. ამ ზოგიერთი პოლიტიკოსის ქმედებებში არ იკვეთება
სახელმწიფოებრივი მიდგომები და ქვეყნის მოსახლეობის
კეთილდღეობის ინტერესების დაცვის სურვილი. სამწუხაროა,
მაგრამ ზოგჯერ ამგვარი სახის პოლიტიკოსების ავანტიურაში
ადვილად ეხვევიან გულწრფელი და პატრიოტული სულით აღსავსე
ჩვენი ვეტრანები, რომელთაც, როგორც ჩანს, ზოგიერთს გულწრფელად
სჯერა, რომ ამ გზით შესაძლებელია ქვეყნის აღმშენებლობა და და
დემოკრატიული ღირებულებების, ტერიტორიული მთლიანობის
აღდგენა, სოციალური და ეკონომიკური პირობების
გაუმჯობესება, ადამიანის უფლებების დაცვის უზენაესი
პრინციპების დამკვიდრება, რაც თავის თავში მოიცავს თითოეული
მოქალაქის პოლიტიკური, კულტურული, სოციალური უფლებების
დაცვას, სამართლიანი სასამართლოსა და სამართლიანობის
დამკვიდრებას. ეს შედეგები მხოლოდ მთლიანი საზოგადოების
ერთობლივი ძალისხმევით არის შესაძლებელი და არა გარკვეული
პოლიტიკოსების ცალკეული გადაწყვეტილებების საფუძველზე,
რომლებიც მხოლოდ პირად ამბიციებს ემყარება და, ნებსით თუ
უნებლიედ, ქვეყნის არაკეთილმოსურნეთა წისქვილზე ასხამს წყალს.
ზემოაღნიშნულიდან გამომდინარე, ვეტერანთა ფედერაციაში
შემავალი ორგანიზაციები, ერთსულოვანი გადაწყვეტილებით
ემიჯნებიან ნებისმიერ ასეთ არასახელმწიფოებრივ მიდგომას,
რომელიც გულისხმობს სხვადასხვა სახის ფიცის დადებას,
დაანონსებულ რევოლუციებს და მსგავს პოლიტიკურად
არალეგიტიმურ ქმედებებს, რომელიც არ გამოხატავს მთელი
საზოგადოების ნებას, არ ემსახურება პრობლემების
მშვიდობიანად გადაწყვეტას და ქვეყნის კეთილდღეობას.
აღნიშნული განცხადება ერთხმად იქნა მიღებული ვეტერანთა
ფედერაციის სხდომაზე, რაც ფედერაციის წევრი
ორგანიზაციების წარმომადგენლებმა ხელის მოწერით
დაადასტურეს. |